hkwalker.net/v3

連續來兩篇在dchome.net列入精華的文章，因為一直有很多朋友問我如何買鏡頭看鏡頭，索性寫出來，以後可以參閱。

小手不時會收到PM問點解買到某件item，點解價錢又竟然係咁，今日就出黎胡亂講一點自己的經驗，大家交流交流

1. 不論買定賣，用行動證明你誠實可信

在ebay就係評分，在本地web就係你個朵。呢樣野無得欺騙人地，因為你一次假個朵就遺臭萬年。

道理非常簡單，我地放野的時候，因為我地並唔係二手佬只係但求錢，所以總係希望賣畀熟人同朋友；更甚的，是因為賣出的器材不多不少都同我地共渡過一點日子，一般人都希望可以交畀一個會善待器材的人。如果我同你三唔識七，點會優先考慮你？

小手賣野的時候，通常會按以下等級順序排列：相熟朋友或版友 > 未見過面但知道係Minolta版友的人 > 方便我交收的人 ／ 出價最高的人

誠信的特質不但會令你更易搵到心頭好，另一方面亦會提高你買返黎的野的質素。

2. 不要忽視徵求Post (WTB) 的作用

除了二手區有野畀大家揀，其實背後仲有一大批師兄師姐睇住，見你個post再考慮係唔係聯絡你。好多時候，珍貴少有的器材你唔提你唔主動要，呢批師兄師姐原來心裡想放都唔知畀邊個好。小手其中一支用呢個途徑買到番黎的，係G-Rokkor 28/3.5

小弟的器材有1/3係用徵鏡post幫助買到的，當中有不少係所謂無可能買到的items，想買野就唔好咁懶了。

3. 最好的賣家：私人賣家

有次去某大出名收得貴二手店睇鏡頭，小手出一個價錢，老闆就拎一支發晒霉的鏡頭de-sell我，最後小手用相若價錢，在私人賣家度買到一支極新的

私人賣家之中有不少是收藏家，同一款鏡買一兩支，一支用一支儲大有人在，質素當然比較有保證，亦值得畀更高價錢。此外，好多收藏家都係經驗豐富的前輩，小手最鍾意在交收個陣同佢地飲番杯茶傾下偈，除左學到野，最重要係可以啟發到你之後攝影的路點走

當然亦有一D擺明係二手佬的人在論壇上發售，我買賣都會盡量避開，一黎試過佢地放飛機浪費你時間，二黎佢地必須將價就貨，三黎完全無意識交個朋友的人，咁對你點解要客氣？

萬一真係要同專賣二手野的人交易，除左要搵個信譽好的，交收時更要加倍細心check；有時候未必係佢故意，但佢庫存item太多可能真係未必check得晒……小手在ebay都有D preferred的二手店既

4. 別人的意見僅供參考，最重要對自己誠實

小手以前成日都有儲鏡的習慣，後來發現自己的使用習慣根本唔係咁，用唔著咁多，要試要轉一轉…… 例子在於最近入的G System，小手係再一次買的，中間受盡冷言冷語：無得上digital，畀人屈話淨係鍾意自動傻瓜，快死高危……etc. 記住，錢係你既，買野最重要自己合用又開心，再傻的決定也不及自己的愉快重要

世界上有太多器材係獨一無二的，有就係有，無就係無，難以logical咁互相取代：你試下將Benz的引擎換落Ferrari丫？

連嗜好都要做跟得夫人，人生就真係無樂趣勒

5. 買的話，最好一套買

又以G2做例子，通常一套三四鏡的會好快賣出，一鏡的話有排都放唔出。你買野返黎未必會放，但比較齊整同品相好的一套，最少會有更大的機會走得甩；意外難免，器材身外物，萬一有需要放時自己有個保障先

6. 交收時即使對方信你，都要不厭其煩強制雙方check清楚

拎番屋企至發現有壞，熟的朋友唔好意思但心中有刺，唔熟的唱衰你，點睇都對你不利，以後搵野放野就難搞

7. 賣野的時候，一定要放相片

買賣的遊戲，通常係一出post最多人追問PM你出offer，正所謂人人執輸行頭慘過敗家；但如果在開頭你都唔出相片，熱潮會過人地唔會再有心去睇，repost咩又會令人心存疑惑，唔知你放的野係唔係有問題，雖然可能乜事都無

到時，你可以選擇放售的人就少好多，麻煩出現的機會亦會增多

小手的野大部分都係短時間內放得出，我諗除左因為花心多人接觸過小弟知我係乜野人，清楚的相片同說明都應該係原因之一

8. 有錯就要認，唔sure就搵專家

有一兩次係小弟交收的時候發現物品出現問題，於是即時收回絕不強逼人買。你可能會蝕少少，但長遠黎講仍係好的；當然亦有好多過份苛求的買家（呢個亦顯示出可以選擇買家同相熟版友的重要性），會點出一D意想不到的野出黎，如果真係毫無道理就收機走，無謂浪費大家時間

畢竟我地唔係十足專家，唔肯定的話，最好番原廠或專家檢查一下，無謂因小失大

Tags: 敗家

This entry was posted on Thursday, November 15th, 2007 at 4:01 pm and is filed under walker@photography, 二手選購, 器材使用. You can follow any responses to this entry through the RSS 2.0 feed. You can leave a response, or trackback from your own site.